A Autoridade Portuaria de Vigo creará unha oficina de cambio climático a través da cal ofrecerá asesoramento en materia de medioambiente e sostibilidade. A mesma estará aberta a usuarios e oficinas, e poranse en marcha dentro do proxecto Digital Cologistics, cofinanciado polo Fondo Europeo de Desenvolvemento Rexional (Feder) da Unión Europea no marco do Programa de Cooperación Interreg VI-A España-Portugal (Poctep) 2021-2027.

Máis concretamente, este servizo prestará asesoramento en relación á mellora da eficiencia enerxética, á diversificación enerxética, sobre emisións contaminantes ou mobilidade sostible. Tamén proporcionará información sobre dixitalización intelixente, mecanismos de xestión sostible, certificacións ou modelo portuario sostible.
Todas aquelas entidades e usuarios que desexen obter máis información poderán poñerse en contacto coa Autoridade Portuaria a través do correo medioambiente@apvigo.es ou mediante o teléfono 986 26 80 00.

Gas de natureza biolóxica

Por outro lado, a Autoridade Portuaria reivindicou, tal e como recolleu Europa Press, que continúa avanzando na súa estratexia de descarbonización e aposta polo medioambiente co obxectivo de converterse no primeiro porto en subministrar gas de natureza biolóxica aos buques de UECC de forma regular.

Neste contexto, nas últimas semanas protagonizou o subministro de BIO GNL a diferentes buques da naviera da man de Naturgy, o provedor deste combustible mariño que permite unha redución do 21% das emisións de gases de efecto invernadoiro (GEI) en comparación cos combustibles mariños convencionais e unha diminución das emisións doutros contaminantes como os óxidos de xofre (Sox) e os óxidos de nitróxeno (NOx). Así mesmo, as partículas (PM) son próximas a cero cando se usa GNL en comparación cos combustibles mariños convencionais, segundo dixo.

“Queremos ser os primeiros en sostibilidade e converter a terminal Ro-Ro no primeiro piloto de España”, reivindicou o máximo responsable portuario, Carlos Botana.